Монголын анхны блокчэйнд суурилсан урамшууллын оноо АрдКойн МетаМаск (MetaMask) болон Итгэмжлэлийн хэтэвч (Trust Wallet) гэх олон улсын хэмжээний 2 хэтэвч дотор нэмэгдэн орлоо. Тэгвэл MetaМask болон Trust Wallet-ын талаар товчхон мэдээлэл хүргэе.
МетаМаск гэдэг нь криптовалютын дансыг Этэриум блокчэйнтэй холбож өгдөг ба түгээмэл ашиглагддаг хөтөч юм. Хэрэглэгчдэдээ хязгааргүй орон зай бүхий төвлөрсөн бус (Dapps) Этэриумын экосистемд холбогдох боломжийг олгодог бөгөөд ингэхдээ блокчэйныг бүхэлд нь татаж суулгах шаардлагагүй байдаг. Иймээс төвлөрсөн бус бирж (DEX), тоглоомын платформ, мөрийтэй тоглоомын газар болон бусад программуудад хялбархан нэвтрэх боломж бүхий хамгийн оновчтой шийдлүүдийн нэг болсон юм.
Уг хэтэвч нь түгээмэл ашиглагддаг хөтчүүд болох Chrome, Firefox, Brave, Microsoft Edge зэрэгтэй зохицдог. Үүнээс гадна МетаМаск нь Этэриумын үндсэн мөнгөн тэмдэгт, ETH-ыг протоколын ERC-20 болон ERC-721 стандартуудын дагуу хадгалдаг.
МетаМаскыг блокчэйн компани болох Консэнсис /ConsenSys/ болон Арон Дэвис /Aaron Davis/ нар хамтран зохион бүтээжээ.
2018 онд Binance-ын эзэмшиж авсан Итгэмжлэлийн хэтэвч нь олон төрлийн койноос бүрддэг хэтэвч юм. Нэг дансанд олон төрлийн криптовалютыг хадгалах, илгээх, хүлээн авах, арилжаалах боломжийг олгодгоороо онцлогтой. Түүнчлэн Bitcoin, Ethereum, Ethereum Classic, Binance Coin болон Ravencoin зэрэг маш олон криптовалютыг дэмждэг байна. Мөн Тезос, Космос, Трон гэх мэт найдвартай баталгаа бүхий койн дээр Стэйкинг хийх боломжтой.
Сэтгэгдлүүд (0)