Эхлүүлсэн ажлынхаа ард заавал гарч байж сэтгэл амрах ёстой гэсэн зарчмаар ажилладаг

Эрхэм уншигч та бүхнийг Хурдтай, Хүчтэй Ардын баг хамт олонтой танилцуулж байна. Энэ удаа Ард Кредит ББСБ ХК-ийн Систем Шинжилгээний Албаны Менежер А.Дунимтай ярилцлаа. 

Товч танилцуулга:

• Нэр: Ариунболдын Дуним

• Мэргэжил: Актуарч

• Төгссөн сургууль: Wartburg College, USA. 

• Албан тушаал: Систем Шинжилгээний Албаны Менежер

• Харъяалагдах компани:  Ард Кредит ББСБ ХК

Юуны өмнө Дуним нэрийн утга, билэгдэл юу юм бэ, тайлбарлаж болох уу? 

“Сайн сайхан” гэсэн утгатай Төвд нэр юм. Сонирхуулж хэлэхэд, дээхэн үед Дуним гээд хүрээний их сайхан эмэгтэй байсан юм гэнэ лээ. Тэгээд эмэгтэй хүүхдийг сайн, сайхан бүсгүй болоорой гэж ерөөгөөд надад энэ нэрийг өгсөн юм билээ.

Ажлынхаа юунд хамгийн их дуртай вэ?

Хэрэгцээ шаардлагатай анализ мэдээллийг бизнесийн шийдвэр гаргахад тусалдаг нь хамгийн их таалагддаг даа.

Актуарч мэргэжлийн гол чиг үүрэг юу байдаг вэ? Түгээмэл бус мэргэжил санагдлаа.

Анх Америкт сурахаар очихдоо мэргэжлийн сонголтоо хийгээгүй байсан. Миний адвайзер зөвлөх багш маань мэргэжил сонголтод нөлөөлсөн юм. Зөвхөн математикаар биш актуар мэргэжил нь хамгийн эрэлттэй мэргэжил бөгөөд надад тохирно гэж зөвлөж байсан юм. 

Актуар мэргэжил нь математик болон статистикийн ухааныг хослуулан санхүү, даатгал, бусад үйл ажиллагааны эрсдэлийн шинжилгээ хийж, дүгнэлт гаргадаг. Оюутан байхдаа сүүлийн семестрээр санхүүгийн групп компанид 4 сар дадлагын ажил хийж байхдаа IТ-д маш сонирхолтой гэдгээ мэдэж авсан. Мөн өөрийн актуар мэргэжлийг компьютерын хэлтэй хослуулан статистик шинжилгээ хийж, бизнесийн хамгийн чухал шийдвэрүүдийг гаргахад нөлөө үзүүлж байгаа нь миний хүсэл зорилго юм байна гэдгийг ойлгосон.

Таны ажил ямар мэргэжилтэй хүмүүстэй илүү хамтран ажиллахад хүргэдэг вэ?

Ер нь бол бүх л албаныхантайгаа хамтарч ажиллаж байна. Нэмж дурдвал, технологи болон зээлийн албатай хамтарч ажилладаг. Миний ажлын хамгийн дуртай нэг үүрэг маань финтек зээлийн “кредит скоринг” сайжруулах буюу илүү найдвартай зээл олгохын тулд харилцагчийн датаг баяжуулах, чанаржуулах юм. Үүн дээр шөнө орой хэд хүртэл ч хамаагүй сууж шинжилгээ хийх дуртай байдаг.

Нэг өдрийн ажлын бүтээмж хамгийн өндөр байдаг үе? Яагаад?

Янз бүр байдаг. Зарим өглөө бүтээмжтэй байдаг нь ажил эхлээд төлөвлөсөн гол ажлуудаа үдээс өмнө дуусгадагтай холбоотой байдаг. Харин чимээгүй орчинд удаан сууж төвлөрч хийх ажлуудаа орой 7-11 цагийн хооронд, хүн багассан үед эсвэл багаараа маш бүтээмжтэй ажилладаг.

Ажлын бүтээмжээ өндөр байлгахад юу хамгийн их нөлөөлдөг гэж боддог вэ? 

Тухайн ажлынхаа зорилгыг тодорхойлоод, түүнийхээ араас юуг ямар дараалалтай хийх ёстойгоо төлөвлөөд ажлаа эхлэхэд үргэлж өндөр үр дүнг хардаг гэж боддог. Мөн эхэлсэн ажлынхаа ард заавал гарч байж сэтгэл амрах ёстой гэсэн зарчмаар ажлыг хийдэг.

Ажил дээрээ хамгийн их ашигладаг зүйл юу вэ?

Polaris, CCM, Excel, SQL, PPT

Ажлын ширээгээ юугаар чимдэг вэ?

Ажлын ширээн дээр ёстой чимэг байхгүйдээ хэхэ. 

Хамгийн анхны компьютер, мөн хамгийн сайн гэж үздэг ямар төрөл/брэндийн компьютерыг дурьдах вэ? 

Хамгийн анх Энэтхэг рүү коллежид явахад Dell-ын компьютер авч байсан. Одоо ч Dell хэрэглэж байна. Сүүлд Америк явахдаа  MacBook 4 жил хэрэглэсэн.  Мөн дараа нь Ардад ороход надад цоо шинэ Asis компьютер авч өгч байсан.  Ер нь хэрэглэж байсан компьютерууд маань бүгдээрээ л миний хэрэглээг хангаж, хамтдаа сайн ажилласан гэж боддог.

Ард - гэхээр хамгийн түрүүнд юу төсөөлөгддөг вэ?

Улаан өнгө, Ч.Ганхуяг захирал, Хөрөнгө Оруулагч Үндэстэнг Цогцлоох зорилго.

Ард Санхүүгийн Нэгдэлд анх ажилд ороод хамгийн их таалагдсан зүйл нь юу байсан бэ?

Миний хамт олон болон хамгийн чухал нь миний удирдлагаар ажиллаж байсан захирал, менежер 2 маань хамгийн их таалагдсан. Ажлыг хурдтай, зогсохгүй, дайчин, хариуцсан ажлаа тултал нь хийж гүйцэтгэх ёстойг ойлгосон. 

Ард Санхүүгийн Нэгдэлд ажилд ороод гүйцэтгэсэн хамгийн анхны томоохон ажил үүрэг юу байсныг дурсвал?

Онлайн зээлийн дүрмийг фактор бүрээр нь ойлгож, хаана юу алдаж, онож байгаа дээр шинжилгээ хийж, чанартай зээл олголтыг дэмжиж, эрсдэлээс хамгаалж чадсан нь миний хамгийн томоохон гүйцэтгэсэн ажил байх гэж боддог.

Ардыг 3 үгээр нэрлэбэл ....?

Хурд, Манлайлал, Хөдөлмөр

Ардад ажилд орох хамгийн том шалтгаан юу байсан бэ?

Би Ганхуяг захирлын лайвыг үзээд Ардын залуучуудын эрч хүчтэйгээр хамтран ажиллаж, шинийг санаачилж байгааг хараад энэ баг хамт олонтой нэгдэх юмсан гэж чин сэтгэлээсээ хүссэн.

Ардын ямар 3 бүтээгдэхүүнүүдийг онцгойлон бусдад санал болгох вэ?

Fast Cash – Онлайн зээл, АрдКойн, Тэтгэврийн хуримтлал

Ардын аль бүтээгдэхүүнийг өдөр тутамдаа хамгийн их ашигладаг вэ?

Өдөр тутмын төлбөр тооцоогоо зөвхөн Ард Аппаараа хийж, гүйлгээний урамшуулал болох АрдКойноо цуглуулдаг. 

Яг одоо ямар бүтээгдэхүүн үйлчилгээ төвлөрөн ажиллаж байна вэ?

Саяхан Ард Апп дээр АрдКойн/Итгэлцэл/Хадгаламж барьцаалсан зээлийн бүтээгдэхүүнүүд орсон байгаа. Дараагийн ээлжид Ардын Брокер, финтек зээлийн дүрмийн сайжруулалт гэсэн ажлууд руугаа орж байна.