Ард Санхүүгийн Нэгдлийн Дотоод Аудитор М. Мөнх-Эрдэнэ зөвлөж байна.
Хувь хүний санхүүгийн байдлын тайлан гэхээр хүмүүс гайхаж магадгүй. Учир нь санхүүгийн байдлын тайлан гэхээр аж ахуй нэгж гаргадаг заавал нягтлан бодогч гаргадаг мэтээр ихэнх нь ойлгодог. Энэ тайланг хувь хүмүүс ч мөн өөрийнхөө санхүүгийн байдлыг хянах, ирээдүйн санхүүгийн төлөвлөлт хийх зорилгоор хялбар аргаар гаргаж болно.
Энэ тайлан нь тодорхой нэг өдрөөр байгаа, таны өөрийн хөрөнгийг тодорхойлох зорилготой тайлан юм. Тайлангаа гаргахын тулд мэдээлэл авах хэрэгтэй. Хялбар байдлаар хэрхэн авах вэ гэхээр сар бүрийн эцэст өөрийн харилцдаг банкуудын харилцах хадгаламжийн дүнг авч тоолно. Мөн харилцдаг үнэт цаасны компаниас үнэт цаасны хуулгаар хэдэн ширхэг хувьцаа бондын үлдэгдэл байгаа, зах зээлийн үнийн мэдээлэл авна, машиныхаа зах зээлийн үнийг машин зардаг сайтаас аваарай, байр орон сууц хашаа байшингийн үнийг бас үл хөдлөхийн сайт, зөвлөхөөс асууж болно, зээлтэй бол банкны эдийн засагчаас зээлийн үлдэгдлээ мэдэж аваарай. Дансны мэдээллээ банкнаас шууд асууж тодруулан хуулгаа авч болохоос гадна ашигладаг интернет банкныхаа мэдээллийг гар утаснаасаа харж болно.
Дээр дурьдсан мэдээллүүдээ сайн цуглуулаад тайлангаа гаргана. Санхүүгийн байдлын тайлан яаж гаргах уу гэхээр, хувь хүн өөрийнхөө бүх хөрөнгийг хөрвөх чадвараар нь ангилан дараалалд оруулж, нийт хөрөнгөө тооцон хөл дүнг нь гаргаж үзнэ. Үүний дараа өр төлбөр, банк санхүүгийн газраас авсан зээлээ мөн богино хугацаанд эргэн төлөгдөх байдлаар дараалалд оруулаад, нийт өр төлбөр зээлийн дүнгээ гаргах юм. Ингээд нийт хөрөнгөөс нийт өр зээлээ хасаад үлдэж буй тэр хөрөнгө таны өөрийн цэвэр хөрөнгө болно.
Хэрэв таны өөрийн хөрөнгө нэмэх гарвал тодорхой хэмжээний хөрөнгөтэй хүн байна гэж ойлгоно, харин хасах утгатай гарвал өөрийн санхүүгийн байдалд анхаарал хандуулах шаардлагатай бөгөөд санхүүгийн хувьд хүндрэлд орсныг тань сануулж байдаг. Мөн миний хөрөнгийн хэдэн хувийг ямар төрлийн хөрөнгө эзэлж байна, хөрвөх чадвар буюу мөнгө рүү болгон хувиргах бололцоо хэр хэмжээнд байна гэдгийг харж болно. Тухайн санхүүгийн байдлын тайланг сар бүр бэлтгэснээр өмнөх сараас энэ сар хөрөнгийн хувьд өсөлт гарч байна уу, өр зээл нэмэгдэж байна уу, эсрэгээрээ буурч байна уу эсвэл хөрөнгө, өр зээл нэмэгдэхгүй тогтмол байна уу гэдгийг анзаарч дүгнэж болно.
Гадаадын хөгжилтэй орнуудад хөрөнгө бий болгох, хадгалах талын онол практик манай улсыг бодвол хэдэн зуун жилээр хөгжсөн учир хувийн санхүүгийн байдлаа тооцох тал дээр мэдээ мэдээлэл харьцангуй сайтай байдаг. Манай улсын хувьдавч үзэхэд, яг одоогоор хувийн санхүүгийн байдлын тайлангаа тогтмол гаргадаг, мэргэжлийн хүрээнээс гаднах хувь хүнтэй таарч байгаагүй гэж бодохоор энэ талдаа нилээн сул байгаа болов уу. Миний хувьд бол сар бүр өөрийн санхүүгийн байдлын тайлангаа гаргаж, дүн шинжилгээ хийдэг. Хүмүүс ихэвчлэн зардлаа хэмнэх талын тайлан мэдээгээ гаргадаг юм шиг санагддаг. Том зургаар өөрийн санхүүгээ харъя гэвэл заавал хувийн санхүүгийн байдлын тайлангаа сар бүр гаргаж өөрчлөлтийг нь харж байгаарай. Хувь хүн санхүүгийн байдлаа тодорхойлж, тайлангаа сар бүр гаргаснаар таны санхүүгийн байдал сайжирна. Учир нь хэн ч санхүүгийн байдлаа хасах руу оруулах биш байнга нэмэгдүүлэхийг зорин ажиллаж байдаг.
Үүнийг тодорхой жишээ баримтаар харах нь илүү тохиромжтой. Энэхүү тайлангаас өөрийн тань хөрөнгө алган дээр тавьсан юм шиг харагддаг учир сар бүрийн өсөлт, хөрөнгө буурч унаж байна уу гэдгийг, мөн хэзээ миний хадгаламж дуусахаар байна, зээлийн сүүлийн хугацаа хэзээ билээ гэх зэрэг мэдээллийг хянаж болдог. Мөн та магадгүй 2021 оны хувийн санхүүгийн байдлын тайлангаа төлөвлөж гаргаад түүнийхээ төлөө ажиллаж, сар, улирал, жилээр нь хянаад байх боломжтой юм. Гаргасан тайлангаасаа тухайн жил хэр амжилттай ажиллав, би жилд хэдэн төгрөгийн хөрөнгө бүтээж, ашигтай ажиллав гэдгээ мөн харахад тусална.
Та загвар файлыг дараах линкээс татаж ашиглаарай. Санхүүгийн тайлангаа илүү үр дүнтэйгээр гаргахад тань туслах болно.
Сэтгэгдлүүд (0)