Монгол Улсын хувьцааны хоёрдогч арилжааны 50 орчим хувь нь Ард Аппаар хийгдсэн

Ард Санхүүгийн Нэгдлийн Санхүү Эрхэлсэн Захирал Б.Золбоотой ажил, карьерын талаар ярилцлаа. 

Ард Санхүүгийн Нэгдэл сүүлийн хэдхэн жилийн хугацаанд маш хурдацтайгаар хүрээгээ тэллээ. Энэ бүх өсөлтийг бий болгохын тулд та бүхэн багаараа хэрхэн ажилладаг вэ?

Багаараа хурдтай ажиллахад зорилго нь ойлгомжтой байх ёстой. Бүгд нэг чиглэлд, нэг зорилгын төлөө харах нь юу юунаас илүү чухал. Ард Санхүүгийн Нэгдлийн гол зорилго  “Хөрөнгө Оруулагч Үндэстэнг цогцлоох”. Улмаар, санхүүгийн зах зээлийг идэвхжүүлж, хүмүүст илүү их боломжуудыг нээж өгөхөд анхаарсан болохоор сүүлийн жилүүдэд маш хурдацтай хүрээгээ тэлсэн болов уу.  Үүнд нөлөөлсөн гол хүчин зүйл нь дэд бүтэц, цахим шилжилт байсан. Өөрөөр хэлбэл, Ковид-19 цар тахал хэзээ нэгэн цагт ирэх байсан цахим шилжилтийг бидэнд хурдлуулж өгсөн. Хүмүүс хүссэн, эс хүссэн ч цахим байдлаар бүх асуудлаа шийдэх хэмжээнд хүрсэн гэсэн санаа. 

Одоогоос 4 жилийн өмнө Ардынхан “Крипто үндэстэн байя, энэ зах зээлийг хөгжүүлье” гээд койн, блокчэйн технологийн давуу талаар ярьж, ном хүртэл гаргаж байж. Койн трэнд болоход цар тахлаас гадна өөр юу нөлөөлсөн гэж бодож байна?

АНУ-ын эдийн засгийн нөхцөл байдал болон Ерөнхийлөгчийн сонгуулийн үр дүн тодорхой хэмжээнд нөлөөлсөн. Нөгөөтэйгүүр, олон улсын томоохон санхүүгийн байгууллагууд криптовалютыг хүлээн зөвшөөрсөн нь түлхэц болсон.

Монголын зах зээлд 4 төрлийн койн бий. АрдКойны тухайд хөрвөдөг гэдгээрээ онцлог шүү дээ. Бусад давуу талынх нь талаар тайлбарлаач, мөн цаашид яаж хөгжүүлэх вэ?

Ард Апп буюу төлбөр тооцооны системд харилцагч болсноор бүхий л санхүүгийн бүтээгдэхүүнийг худалдан авах боломж бүрдэхийн сацуу АрдКойны урамшуулал давхар эдэлнэ. Сонирхуулахад, энэ жил DAX бирж дээр 1.6 их наядын арилжаа явсны  талаас дээш хувийг АрдКойны арилжаа бүрдүүлсэн. Эндээс АрдКойны хөрвөх чадвар ямар байгааг харж болно. 

Ард Санхүүгийн Нэгдэл Монголын Хөрөнгийн Бирж дээр хамгийн олон IPO хийсэн шүү дээ. Мөн  “Цахим хөрөнгө оруулагч байя” гэсэн уриалга гаргасан. Үүний талаар нэмэлт мэдээлэл өгөөч?

Цахим, хялбар шийдэл, дэд бүтцийг нь бид олгоё. Харин та хувьцаа авч, хөрөнгө оруулалт хий гэсэн үг. Тухайлбал, Ард Аппын үнэт цаас цэс рүү орж, Монголын Хөрөнгийн Биржид арилжаалагдаж буй дурын хувьцааг авах боломжийг бүрдүүлсэн. Энэ нь маш том ахиц дэвшлийг авчирч байгаа бөгөөд Хөрөнгийн Биржийн идэвхжилд эерэгээр нөлөөлж буй. Учир нь 2021 оны эхний гурван улиралд хоёрдогч зах зээлийн нийт арилжааны 50 орчим хувь нь Ард Аппаар хийгдсэн. Тодруулбал, Монгол Улсын хөрөнгийн зах зээлийн гараа солилцож буй арилжааны 50 орчим хувийг хүмүүс гар утсаараа Ард Апп ашиглан хийсэн гэсэн үг. Энэ бол хөгжиж буй орнуудтай харьцуулахад, өндөр үнэлгээ төдийгүй хэрэглэгчид цахим шилжилтэд бэлэн байгаа нь харагдаж буй. 

Залуус өөрсдийгөө захирал болох болоогүй гэж хардаг бол нөгөө талдаа Ерөнхий захирлууд залууст итгэл хүлээлгэхдээ цаанаа нэг асуултын тэмдэгтэй байдаг. Ямар шалгуурт тэнцэж, өөрийгөө хэрхэн дайчилснаар өдгөө 30 гаруй компанийн нэгдэл болсон Ардын Санхүү Эрхэлсэн Захирлын албан тушаалд томилогдсон бэ?

Манай компанийн удирдлагууд заавал туршлага дээр үндэслэлгүй тухайн хүний хүсэл тэмүүлэл, эрмэлзэл, зорилго дээр үндэслэн дэмждэг. Мэдээж ажлын байранд дэвшихэд, гүйцэтгэх захирлын хэмжээнд очиход мэдлэг, боловсрол маш чухал. Миний хувьд, блокчэйн, АрдКойн гэх мэт анхны судалгааны багаас нь оролцоотой байж, шинэ, шинэлэг санаачлагуудыг дэвшүүлж байсан учраас  өнөөгийн байр сууринд ирсэн байх. Түүнчлэн Монголын хамгийн анхны Хөрөнгийн биржид бүртгэлтэй Үндэсний Хувьчлалын Сангийн үүсгэн байгуулагчийн нэгээр ажилласан.